ပြည်နယ် နယ်နိမိတ်တွေကို flexible territory ထားရေး / အထက်လွှတ်တော်သည် လူမျိုးစုလွှတ်တော် ဖြစ်ရေး

ပြည်နယ် နယ်နိမိတ်တွေကို flexible territory ထားရေး / အထက်လွှတ်တော်သည် လူမျိုးစုလွှတ်တော် ဖြစ်ရေး
လူမျိုး ၁၄၄ မျိုးရှိပြီး သမိုင်းကြောင်း အငြင်းပွါးမှုတွေ များပြားတဲ့ အထဲ ပြည်နယ်နာမည်တွေကိုလူမျိုးနာမည်တွေ ပေးထားတဲ့ ဒီပြည်ထောင်စုကို ဘယ်လို ဖက်ဒရယ် လုပ်မလဲ ဆိုတဲ့  မေးခွန်းအတွက် အဖြေက
 အကောင်းဆုံးအဖြေက  လူမျိုးနာမည် နဲ့ ပြည်နယ်တွေကို ဒေသနာမည် ပြည်နယ်အဖြစ်ပြောင်းလဲ ဖို့ပဲ။ မဟုတ်ရင် လူမျိုးစွဲ နဲ့ နယ်လု ကြမယ်။ လူမျိုးစွဲနဲ့  လူမျိုးကြီး လူမျိုးသေး ပြဿနာဆင့်ကဲ ဆင့်ကဲ ပေါ်နေမှာပဲ။ 

 အဲဒီလိုမှ နားချ လို့ တရားမရကြရင်  ဖိနပ် မတော်လို့ ဖနောင့်လှီး လို့လည်း မရ။
ခက်လှပါတယ်။  အကြံ ၂ ခုတော့ ရှိတယ်။ စဉ်းစားတော်မူကြပါ

(၁) ပြည်နယ် နယ်နိမိတ်တွေကို flexible territory ထားရေး။ 

လူမျိုးစွဲ နဲ့ ဆိုရင် ပြည်နယ် နယ်နိမိတ်ဟာ ကမ္ဘာတည်သရွေ့ ငြင်းမဆုံးဘူး။ သမိုင်း သုတေသနပညာရပ် မခိုင်မာတဲ့ ဒီနိုင်ငံမှာ ပုဂံရာဇဝင် ဒုတ်ထမ်း ပြောရသလိုပဲ၊ ငြင်းလိုက် ထရိုက်လိုက်နဲ့ ရန်ပွဲတွေ မဆုံးဘူး။
ပြည်နယ်နယ်နိမိတ်ကို   flexible  ထားသင့်တယ်။ မြို့နယ် လူထုက ဆန္ဒအရ ဘယ်ပြည်နယ်ထဲ ပါမယ်ဆိုတာ ၅ နှစ် တခါ ဆန္ဒပြုခွင့်ရှိရမယ်။ ပြည်နယ်တွေကိုလည်း နယ်မြေတဆက်ထဲ ရှိစရာလိုပဲ  ရှမ်းမြောက်ပြည်နယ်၊ ရှမ်းတောင်ပြည်နယ်၊ ဝမြောက်ပြည်နယ်၊ ဝတောင်ပြည်နယ် စသည်ဖြင့် ရှိသင့်တယ်။ လူမျိုးတွေရဲ့ အသိပညာ မြင့်မှု၊ သမိုင်းသုတေသနဖော်ထုတ်မှု တွေနဲ့ ၅ နှစ် ၁၀ နှစ်တခါမြို့နယ်နေလူထု ဆန္ဒခံယူပွဲ နဲ့ ဘယ်ပြည်နယ်ထဲ ပါမလဲ ဆုံးဖြတ်ခွင့်ရှိသင့်တယ်

ပြည်နယ်အသစ်တွေလည်း ပေါ်လာမှာ ဖြစ်လို့ ပြည်နယ် နယ်နိမိတ်တွေကို flexible territory ထားရှိရေးဟာ ပြုလွယ်ပြင်လွယ်သော စနစ်ဖြစ်တယ်

(၂) အထက်လွှတ်တော်သည် လူမျိုးစုလွှတ်တော် ဖြစ်ရေး

လူမျိုးစုလွှတ်တော် ဆိုတာ ပြည်နယ်စုလွှတ်တော် မဟုတ်ဘူး။ လူမျိုး ၁၄၄ မျိုးရှိရင် တမျိုးစီ ကတူညီသော အမတ်တွေ တက်ရောက်တဲ့ "လူမျိုးစုလွှတ်တော် " အစစ်ဖြစ်ရမယ်။ ပြည်နယ်တခုစီကတူညီသော အမတ်တွေ တက်ရောက်တဲ့ "ပြည်နယ်စုလွှတ်တော် " မဖြစ်သင့်ဘူး။ ဒါကို ကွဲပြားဖို့ လိုတယ်။

ဆိုလိုတာက  ၈ ပြည်နယ် x ၁၀ =  အမတ် ၈၀  မဟုတ်ပဲ၊ လူမျိုး ၁၄၄ x ၁ = အမတ် ၁၄၄ ယောက် နဲ့ဖွဲ့စည်းတဲ့ လူမျိုးစုလွှတ်တော် ဖြစ်သင့်တယ်။  ကွဲပြားသော လူမျိုးတွေ ဖြစ်ရမယ် ဆိုတာ ဥပဒေကတိတိကျကျ ပြဒါန်းပေးရမယ်။ ဥပမာ  ဓနု + ရှမ်း = ရှမ်းအမတ် ၂ ဆိုပြီး ဓနု ကို ရှမ်း ကိုယ်စားပြုလို့ မရဘူး။ 

အခု မှားနေကြတာက လူမျိုးကြီးတမျိုးက  ပြည်နယ်နာမည်ခံပြီး ပြည်နယ်အာဏာယူပြီးလူမျိုးစုလွှတ်တော်တက်နေကြတာပဲ။ အဲဒါ ဟုတ်သလိုလိုနဲ့ လွဲနေတယ်။

 လူမျိုးဆိုတာ ပြည်နယ်နဲ့ မဆိုင်ဘူး။ ပြည်နယ်တိုင်းမှာ လူမျိုးစုံရှိနေတယ်။ အဲဒီ လူမျိုစုံနေတဲ့ပြည်နယ်ကို လူမျိုးကြီးတမျိုးက ကိုယ်စားပြုတယ်ဆိုတာ တော်တော် အဆီအငေါ်မတည့်ဘူး။ 

လူမျိုးစုလွှတ်တော်ဆိုတာ ဘာကန့်သတ်ချက်မှ ချည်နှောင်မထားတဲ့၊ ဘာမှ အထူးအခွင့်အရေးမှ ကိုင်မထားပဲ လူမျိုးတွေ စုပေါင်းပြီး ဆုံးဖြတ်တဲ့ လွှတ်တော်ပဲ ဖြစ်သင့်တယ်။