ထူးဆန်းသော ဆောင်းပါး နှစ်ပုဒ်

ပထမ ဆောင်းပါးက ချင်း၊ ကရင်၊ ကရင်နီ ဘက် သွာရောက် အင်တာဗျူး ခဲ့တဲ့ အမေရိကန် ၊ မဟာဗျူဟာနှင့် နိုင်ငံတကာလေ့လာမှုများဗဟိုဌာန က အဖွဲ့ဝင် တဦးရဲ့ ဆောင်းပါး ဖြစ်တယ်။ EAO တွေနဲ့ PDF တွေဟာ NUG ကို ဗဟိုပြုထားတာ မဟုတ်ပဲ တော်လှန်ရေးပြီးရင် တိုင်းဒေသကြီး နယ်မြေတွေကို သိမ်းပိုက်ပြီး သီးခြား နိုင်ငံ ထူထောင်ပြီး ကွန်ဖက်ဒရေးရှင်း သို့မဟုတ် လွတ်လပ်သော နိုင်ငံများ အဖြစ် ခွဲထွက်နိုင်တယ် လို့ ရေးသားထားတယ်။

ဒုတိယဆောင်းပါးက KNU၊ KNPP၊ CNF အထွေထွေအတွင်းရေးမှုး ၃ ယောက်က အာဆီယံ ကို ဦးတည် တောင်းဆိုတဲ့ ဆောင်းပါး ဖြစ်တယ်။ မအလ ရွေးကောက်ပွဲကြောင့် နွေဦးတော်လှန်ရေးက ဒီမိုကရေစီ တော်လှန်ရေးသမားတွေ က ပြည်ထောင်စုကို တစစီ ပြိုကွဲစေလိမ့်မယ်။ ဒါပေမယ့် မိမိတို့ ERO တွေက ခွဲထွက်မည့်သူများ မဟုတ်ကြောင်း၊ ဖက်ဒရယ်ကို လိုလားပါကြောင်း ကို မအလက သိရှိပါကြောင်း၊ မိမိတို့က PDF နဲ့ NUG ကို ကူညီထောက်ပံ့ထားပါတယ်။ နိုင်ငံတကာအထောက်အပံ့တွေကို ERO တွေဆီသို့ စီးဆင်းရန်၊ ငြိမ်းချမ်းရေးအတွက် မအလ နဲ့ ညှိပေးဖို့ အာဆီယံကို တောင်းဆိုထားပါတယ်။

အောက်မှာ အဓိက အချက်တွေကို ကောက်နုတ်ဖော်ပြထားတယ်။ မူရင်း link လည်း ပေးထားပါတယ်။

KNU ၊ KNPP ၊ CNF အတွင်းရေးမှူးတွေဟာ ... ဖက်ဒရယ် ဒီမိုကရေစီ ဖွဲ့စည်းပုံ၊ အကူးအပြောင်း ကာလ စစ်အာဏာရှင်တွေကို တရား စီရင်ရေး .... မပါတော့ပဲ .. မအလ နဲ့ ငြိမ်းချမ်းရေး တွေ့ဆုံဆွေးနွေးရေးကို ဦးတည်တောင်းဆိုနေကြတယ်။ မအလစစ်တပ်က " အာဏာခွဲဝေ အုပ်ချုပ်းခွင့်" ပေးရင်ပဲ ကျေနပ်ကြမယ်လို့ နားလည်မိတယ်

အခြားတိုင်းရင်းသား လော်ဘီတွေဟာ "ဗမာပြည်နယ် ဖွဲ့ရေး၊ ဗမာလူမျိုးကြီး ဝါဒ တိုက်ဖျက်ရေး ၊ ကွန်ဖက်ဒရေးရှင်း၊ ခွဲထွက်ရေး" စတဲ့ အစွန်းရောက် ဝါဒမှိုင်းတွေ ကို NLD NUG CRPH ကို " ကြပ်"ပေးရုံ ၊ NUG CRPH ကို မယုံကြည်ရသေးကြောင်း ဆင်ခြေပေးရုံ သက်သက် လုပ်ဆောင်နေကြ လား မေးခွန်းထုတ်ရပါမယ် ဘာကြောင့် အမေရိကန်၊ အာဆီယံ နဲ့ နိုင်ငံတကာက ထိရောက်တဲ့ စစ်လက်နက် အကူအညီ တွေ မပေးသလဲ ဆိုတဲ့ အဖြေကတော့ ညီညွတ်သော စုစည်းမှု မရှိ သောကြောင့် ဖြစ်တယ်။ ERO အတွင်းရေးမှူး ၃ ယောက်ဟာ ဒီအချက်ကို သိပေမယ့် တလွဲ ဆံပင်ကောင်းနေကြတယ်။ တကယ်ဆန္ဒမရှိကြရင် ဖက်ဒရယ် ဒီမိုကရေစီ ဟာ စကားလုံးနိုင်ငံရေး ဘဝနဲ့ သားလျောသွားနိုင်တယ်။ ၁၉၉၁ နယူးယောက်တိုင်းမ် သတင်းစာပါ Thomas L. Friedmanရေးတဲ့ The World; A Rising Sense That Iraq's Hussein Must Go (July 7, 1991) က စာပုဒ်တချို့ကို ဖော်ပြလိုက်တယ်  

=======================================================


မြန်မာ့တော်လှန်ရေးတပ်ဖွဲ့များ၏ ရှေ့တန်းစခန်းများမှ တိုက်ရိုက် သတင်းစကားများ

News from the Front: Observations from Myanmar’s Revolutionary Forces

Commentary by Michael Martin Published December 5, 2022

Michael Martin သည် ဝါရှင်တန်ဒီစီ၊ မဟာဗျူဟာနှင့် နိုင်ငံတကာလေ့လာမှုများဗဟိုဌာန၊ အရှေ့တောင်အာရှ အစီအစဉ်မှ (ဌာနေမဟုတ်သော) အချိန်ပိုင်းအဖွဲ့ဝင်တစ်ဦးဖြစ်သည်။

မြန်မာနိုင်ငံ၏ အဓိကတိုင်းရင်းသား လက်နက်ကိုင်အဖွဲ့ (EAO) အချို့မှ ကိုယ်စားလှယ်များ၊ ပြည်သူ့ကာကွယ်ရေးတပ်ဖွဲ့ (PDF)အဖွဲ့ဝင်များအပြင် အခြားသူများနှင့် တွေ့ဆုံရန် စာရေးသူသည် အိန္ဒိယနိုင်ငံ အိုက်ဇောမြို့နှင့် ထိုင်းနိုင်ငံ ချင်းမိုင်၊ မဲဆောက်မြို့များသို့ အောက်တိုဘာလလယ်က သွားရောက်ခဲ့သည်။

တစ်စိတ်တစ်ပိုင်းအားဖြင့် စနစ်တကျ ပြင်ဆင်ထားသော အင်တာဗျူး အများအပြား ပြုလုပ်ခဲ့ပြီးနောက် စာရေးသူသည် ပဋိပက္ခ၏ ပကတိ အခြေအနေများကို ကိုယ်တွေ့ကြားသိခဲ့ရသလို ဒီမိုကရေစီအတွက် တိုက်ပွဲဝင်နေသူများအနေဖြင့် ၎င်းတို့၏ တိုက်ပွဲအောင်နိုင်ရေးအတွက် အမေရိကန်အစိုးရထံမှ မည်သည့်အကူအညီများ ရရှိရန် လိုလားနေသည်ကို သိရှိခွင့်ရရှိခဲ့သည်။

ဤဆောင်းပါးတွင် အဆိုပါ ခရီးစဉ်အတွင်း လေ့လာတွေ့ရှိချက်များကို အကျဉ်းချုပ်တင်ပြကာ အာဏာသိမ်းပြီးနောက်ပိုင်း မြန်မာနိုင်ငံ၌ လက်ရှိဖြစ်ပေါ်နေသည့် အဓိကအခြေအနေများကို ကောက်နုတ် ဆွေးနွေးထားသည်။
xxx

ကိုယ်တိုင်ဖွဲ့စည်း တည်ထောင်ထားသော အမျိုးသားညီညွတ်ရေးအစိုးရ(NUG) သည် ရံဖန်ရံခါအဆိုပါ ဆွေးနွေးပွဲများတွင် တစ်စိတ်တစ်ပိုင်း ပါဝင်နေသော်လည်း EAO နှင့်PDF အဖွဲ့များ သိရှိထားသမျှ ဆွေးနွေးမှုများကို NUG က ဦးဆောင်နေခြင်း မရှိပေ။ အချို့သော EAO နှင့်PDF အဖွဲ့များအတွင်း၌ လွတ်လပ်သော နိုင်ငံတစ်ခု တည်ထောင်ဖွဲ့စည်းနိုင်မည့် ဖြစ်နိုင်ချေ အလားအလာကိုပါ ထည့်သွင်းစဉ်းစားလျက်ရှိကြသည်။

xxx


ယေဘုယျအားဖြင့် တွေ့ဆုံမေးမြန်းခဲ့သည့် EAO နှင့်PDF များ၏ ရုပ်လုံးဖော်မှုသည် မြန်မာနိုင်ငံဆိုင်ရာ အထူးအကြံပေးကောင်စီ(SAC-M) ၏ အစီရင်ခံစာပါအချက်များနှင့် ကိုက်ညီလျက်ရှိပြီး သိသာသည့် ကွဲလွဲမှုတစ်ချက်သာ တွေ့ရှိရသည်။ ၎င်းမှာ တော်လှန်ရေးစစ်ပွဲ၏ အရေးပါသော အဖွဲ့တစ်ခုအဖြစ် NUG ကို SAC-M အစီရင်ခံစာက ပုံဖော်ထားသော်ငြား NUG သည် တော်လှန်ရေးလှုပ်ရှားမှု၌ အရေးကြီးသော အခန်းကဏ္ဍမှ ပါဝင်နေသည်ဟု EAO နှင့်PDF များက ရှုမြင်ကြပုံ မရဘဲ ၎င်းတို့၏စစ်ရေးမဟာဗျူဟာ ရေးဆွဲရေးနှင့် လက်နက်အထောက်အပံ့ ရရှိရေးတို့အတွက် NUG အပေါ် မှီခို အားထားမှု တစ်စုံတစ်ရာ ရှိနေကြောင်းလည်း ပြသနေခြင်းမရှိသည့် အချက်ဖြစ်သည်။ စစ်ကောင်စီတပ်များကို အနိုင်ယူပြီးနောက် NUG နှင့် ပူးပေါင်းလုပ်ကိုင်မည်/ မလုပ်ကိုင်မည်ဆိုသည်နှင့် ပူးပေါင်းမည်ဆိုပါက မည်သို့လက်တွဲမည်ဆိုသည် တို့မှာ မသေချာ မရေရာသေးကြောင်း EAO နှင့် PDF များက ပြောဆိုသည်။
xxx

ထို့အပြင် EAO နှင့်PDF အဖွဲ့များသည် အိမ်နီးချင်း တိုင်းဒေသကြီးများ၌ အစဉ်အလာအားဖြင့် ၎င်းတို့နယ်မြေအဖြစ် ရှုမြင်ထားသော ဒေသအချို့အား ၎င်းတို့ပြည်နယ်အတွင်းသို့ သွတ်သွင်း၍ နယ်မြေချဲ့ထွင်ရန်ကိုလည်း စဉ်းစားလျက်ရှိသည်။
xxx

ယေဘုယျအားဖြင့် ပြည်နယ်အစိုးရများ ဖွဲ့စည်းခြင်းသည် အခြားတိုင်းရင်းသား ပြည်နယ်များနှင့် ပူးတွဲတည်ထောင်မည့် ဗမာလူမျိုးများပါ ပါဝင်နိုင်ချေရှိသော ဖက်ဒရယ်သမ္မတနိုင်ငံ သို့မဟုတ် ကွန်ဖက်ဒရေးရှင်း နိုင်ငံတစ်ခုသို့ ပေါင်းစပ်ပါဝင်မှု၏ ရှေ့ပြေးအစီအစဉ်ဖြစ်သည်ဟု EAO နှင့်PDF အဖွဲ့များက ရှုမြင်ကြသည်။
၎င်းတို့၏ဆွေးနွေးပွဲများ၌ အဓိကကျသော အချက်တစ်ချက်မှာ အဆိုပြုထားသော ဗဟိုအစိုးရနှင့် အသစ်ဖွဲ့စည်းထားသော ပြည်နယ်အစိုးရများအကြား အာဏာခွဲဝေရေး ဖြစ်သည်။

EAO အများအပြား၏ အမြင်အရ ၁၉၄၈ ခုနှစ် ဥပဒေအပါအဝင် လွတ်လပ်ရေး ရပြီးကတည်းက ပေါ်ထွန်းခဲ့သမျှ မြန်မာ့ဖွဲ့စည်းပုံအခြေခံ ဥပဒေအားလုံးသည် ဗမာလူမျိုးကြီးစိုး ထားသည့် ဗဟိုအစိုးရအား အာဏာအလွန်အမင်း ခွဲဝေပေးထားသည်ဟု ယူဆလျက်ရှိသည်။

လက်ရှိအချိန်၌ နည်းလမ်းသုံးခုကို ဆွေးနွေးနေကြသည်။ ပထမနည်းလမ်းမှာ ဗဟိုအစိုးရ၏ အာဏာကို ကန့်သတ်ပြီး သက်ဆိုင်ရာ တိုင်းရင်းသား ပြည်နယ်များကို ကိုယ်ပိုင်အုပ်ချုပ်ခွင့် အမြောက်အများ ပေးအပ်မည့် ဖက်ဒရယ်သမ္မတနိုင်ငံ တည်ထောင်ခြင်း ဖြစ်သည်။

ဤဖက်ဒရယ်သမ္မတနိုင်ငံတွင် လက်ရှိ တိုင်းရင်းသားပြည်နယ် ၇ ခုနှင့် အသစ်ဖွဲ့စည်းထားသော ဗမာလူမျိုးအတွက် ပြည်နယ်တစ်ခုတို့ ပါဝင်ဖွယ် ရှိပြီး ဝ လူမျိုးနှင့် ရှမ်းပြည်နယ်ရှိ အခြားတိုင်းရင်းသား အုပ်စုများအတွက် ပြည်နယ်အသစ်များလည်း ပါဝင်လာနိုင်သည်။ အဆိုပါ ဖက်ဒရယ်သမ္မတနိုင်ငံတွင် ပြည်နယ်အားလုံးသည် ဗဟိုအစိုးရအတွင်း တူညီသော အာဏာကိုယ်စီ အသီးသီး ရှိကြမည်ဖြစ်သည်။

ဒုတိယနည်းလမ်းမှာမူ ဗဟိုအစိုးရ၏ အာဏာကို နိုင်ငံ့ကာကွယ်ရေးကဲ့သို့ ကဏ္ဍအတွက်သာ အလွန်အမင်း ကန့်သတ်ထားမည့် ကွန်ဖက်ဒရေးရှင်းစနစ် ဖြစ်သည်။ ဤပုံစံကို ရခိုင်တပ်မတော်နှင့် ဝပြည် သွေးစည်းညီညွတ်ရေး တပ်မတော်တို့က အဆိုပြုထားခြင်းဖြစ်သည် ဟုသိရှိရပြီး အချို့ EAO နှင့် PDF များအတွင်း ၎င်းနည်းလမ်းကို ထောက်ခံသူများရှိနေသည်။

တတိယနည်းလမ်းမှာ သီးခြားလွတ်လပ်သော နိုင်ငံများအဖြစ် ရပ်တည်ရန် ဖြစ်သည်။ အချို့ချင်းနှင့် ကရင်အဖွဲ့များအတွက် သီးခြားလွတ်လပ်သော နိုင်ငံအယူအဆက ဆွဲဆောင်မှု ရှိနေသော်လည်း လွတ်လပ်ရေးကြောင့် ပေါ်ထွန်းလာမည့် ၎င်းတို့၏ နိုင်ငံတော်သစ်အတွက် စိန်ခေါ်မှုများ ရှိနေသည်ကို အသိအမှတ်ပြု လက်ခံကြသည်။

တွေ့ဆုံမေးမြန်းခဲ့သည့် ပုဂ္ဂိုလ်တစ်ဦးချင်းအနေဖြင့် ကမ္ဘာ့ကုလသမဂ္ဂနှင့် အမေရိကန် ပြည်ထောင်စုအပါအဝင် နိုင်ငံတကာအသိုင်းအဝိုင်း၏ အသိအမှတ်ပြုမှု ရရှိရေးအတွက် အထူးစိုးရိမ်ပူပန် လျက်ရှိကြောင်း ပြောဆိုကြသည်။

https://www.csis.org/analysis/news-front-observations-myanmars-revolutionary-forces

https://bit.ly/3RxhUtm

(Center for Strategic & International Studies (CSIS) စာစဥ်ပါ Michael Martin ၏ “News from the Front: Observations from Myanmar’s Revolutionary Forces” ဆောင်းပါးကို ဆီလျှော်အောင် ဘာသာပြန်ဆိုထားခြင်း ဖြစ်ပါသည်။ )

=======================================================

ASEAN must help reverse Balkanization of Myanmar

အစိတ်စိတ်အမွှာမွှာ ပြိုကွဲမည့်လမ်းကြောင်းမှ မြန်မာနိုင်ငံ နောက်ပြန်လှည့်အောင် အာဆီယံ ကူညီရမည်

Ta Doh Moo and Salai Thla Hei

January 31, 2023 17:00 JST

 ဆောင်းပါးရှင်များ ဖြစ်သော တာဒိုမူး(Ta Doh Moo) သည် ကရင်အမျိုးသား အစည်းအရုံး (KNU) ၏ အထွေထွေ အတွင်းရေးမှူးဖြစ်ပြီး ဆလိုင်းသလဟေး(Salai Thla Hei ) သည် ချင်းအမျိုးသားတပ်ဦး (CNF) ၏ အထွေထွေ အတွင်းရေးမှူး ဖြစ်သည်။ ကရင်နီအမျိုးသား တိုးတက်ရေးပါတီ (KNPP) အထွေထွေ အတွင်းရေးမှူးဖြစ်သူ ခူပလူးရယ် (Khu Plu Reh) ကလည်း ဤဆောင်းပါးကို ပူးတွဲရေးသားခဲ့သည်။

xxx

ဆောင်းပါးရှင်များသည် မြန်မာနိုင်ငံတစ်ဝှမ်း လက်နက်ကိုင် တော်လှန်ရေးကြီးအတွက် ခိုနားစရာနေရာ၊ လေ့ကျင့်မှုနှင့် စစ်ဆင်ရေး အကူအညီများ ပေးအပ်နေသည့် တိုင်းရင်းသား လက်နက်ကိုင်အဖွဲ့များမှ ခေါင်းဆောင်များ ဖြစ်သည်နှင့်အညီ မိမိတို့၏ ရှေ့တန်းစစ်မျက်နှာပြင်မှ အမြင်များသည် ကာလတာရှည်နေသော မြန်မာ့ပဋိပက္ခများအတွက် အာဆီယံ၏ချဉ်းကပ်မှု ပိုမိုထိရောက်အကျိုးရှိစေရေး အဓိကအရေးပါသော အခြေခံအုတ်မြစ်များအဖြစ် အထောက်အကူပြုနေသည်ဟု ယုံကြည်မိပါသည်။

xxx

 အမေရိကန်ပြည်ထောင်စု၏ မြန်မာအက်ဥပဒေအရ တော်လှန်ရေးအတွက် အရေးကြီးသော လူသားချင်းစာနာမှု အကူအညီနှင့် လူသေဆုံးနိုင်မှုနှင့် မပတ်သက်သော အထောက်အပံ့များကို ခွဲဝေပေးအပ်သွားမည်ဖြစ်သည်။ စာရေးသူတို့၏ တိုင်းရင်းသားတော်လှန်ရေးအဖွဲ့များသည် မြန်မာ့တော်လှန်ရေး၏ အဓိကအမာခံ ကျောရိုးများပင် ဖြစ်ကြသည်။

xxx

ယခုနှစ် ရွေးကောက်ပွဲကို ဒီမိုကရေစီနည်းလမ်းတကျ ကျင်းပနိုင်လိမ့်မည်ဟု မည်သူမျှ မယုံကြည် ကြသလို စစ်ကောင်စီအဖွဲ့အတွင်းမှာပင် ယုံကြည်လက်ခံမည့်သူ မရှိပေ။ စစ်တပ်ထောက်ခံသော ပါတီအနိုင်ရရှိပါက ဒီမိုကရေစီတော်လှန်ရေး အင်အားစုများက ရွေးကောက်ပွဲရလဒ်ကို ပယ်ချမည် ဖြစ်ကာ တိုင်းပြည်တွင် နောက်ထပ်အကွဲအပြဲများ(သို့မဟုတ်) ပို၍ အတိအကျပြောရလျှင် ၂၀ရာစု အစောပိုင်းက နိုင်ငံငယ်လေးများအဖြစ် အစိတ်စိတ်အမွှာမွှာပြိုကွဲခဲ့သည့် ဘော်လကန်ကျွန်းဆွယ် ဒေသကိုအစွဲပြု၍ ခေါ်ဝေါ်သုံးစွဲလျက်ရှိသော ဘော်လကန်နိုက်ဇေးရှင်း (တိုင်းပြည် အစိတ်စိတ်အမွှာမွှာ ပြိုကွဲမှုများ) ဆက်လက် ဖြစ်ပေါ်လာပေလိမ့်မည်။

xxx

 ရွေးကောက်ပွဲသည် အဖြေတစ်ခုမဟုတ်ဘဲ တိုင်းပြည်ပြိုလဲဖို့သာ အကြောင်းဖန်လာလိမ့်မည် ဖြစ်ကြောင်း အာဆီယံနှင့် နိုင်ငံတကာ အသိုင်းအဝိုင်းက စစ်ကောင်စီခေါင်းဆောင် မင်းအောင်လှိုင်ကို အလေးအနက်ပြောဆိုရန် လိုအပ်နေသည်။ ထို့အပြင် မင်းအောင်လှိုင်သည် လက်ရှိသတ်ဖြတ်နေမှုများကို ရပ်ဆိုင်း၍ ဒီမိုကရေစီတော်လှန်ရေး အင်အားစုများနှင့် တွေ့ဆုံဆွေးနွေးရန်လည်း လိုအပ်သည်။

xxx

တစ်ဖက်တွင်မူ အထက်ပါ အနုတ်လက္ခဏာများနှင့် လုံးကွဲပြားခြားနားသည့် အနေအထားအဖြစ် ဆောင်းပါးရှင်တို့ တော်လှန်ရေးအင်အားစုများ၏ ထိန်းချုပ်နယ်မြေဧရိယာသည် တဖြည်းဖြည်း ကျယ်ပြန့်လာလျက်ရှိသည်။ မြန်မာနိုင်ငံရှိ တိုင်းရင်းသားတော်လှန်ရေးအုပ်စု အများအပြားသည် မိမိတို့ ထိန်းချုပ်ရာဒေသ၌ အစိုးရတစ်ပိုင်း အဖွဲ့များအဖြစ် ဆယ်စုနှစ်များနှင့်ချီသော အုပ်ချုပ်မှု အတွေ့အကြုံများ ရရှိနေကြပြီဖြစ်သည်။

xxx

ထို့အပြင် နေရပ်စွန့်ခွာ ထွက်ပြေးသူ ၂ သန်းအတွက် ကာကွယ်စောင့်ရှောက်မှုများကို လက်ရှိအချိန်၌ ကျွန်တော်တို့ ပေးအပ်လျက် ရှိသည်။ အရေးကြီးသည့်အချက်တစ်ချက်မှာ ဝန်ကြီးများအပါအဝင် အတိုက်အခံ အမျိုးသားညီညွတ်ရေး အစိုးရ (NUG) အတွက် ကယ်ဆယ်ရေး လုပ်ငန်းများကို ကျွန်တော်တို့ဆောင်ရွက်ပေးခဲ့ကာ ၎င်းတို့အတွက် ဘေးကင်းလုံခြုံသော နေရာများ ပေးအပ်ထားခြင်းဖြစ်သည်။

xxx

 ဗမာလူငယ် တော်လှန်ရေးသမား ၁ သိန်း ကျော်သည် စာရေးသူတို့၏ နယ်မြေများတွင် မှီတင်းနေထိုင်လျက်ရှိကြပြီး ထောက်ပံ့ပို့ဆောင်ရေး၊ စစ်ဆင်ရေးနှင့် နိုင်ငံရေးအပိုင်းများတွင် ကျွန်တော်တို့က ၎င်းတို့ကို ပံ့ပိုးကူညီလျက်ရှိသည်။

xxx

ဆောင်းပါးရှင်တို့၏ တိုင်းရင်းသား တော်လှန်ရေးအဖွဲ့များသည် လွတ်လပ်ရေး သို့မဟုတ် ခွဲထွက်ရေးအတွက် တိုက်ပွဲဝင်နေကြခြင်းမဟုတ်ဘဲ လူများစု ဗမာလူမျိုးများနှင့် အာဏာခွဲဝေ အုပ်ချုပ်မည့် ဖက်ဒရယ်စနစ်အတွက် တိုက်ပွဲဝင်နေခြင်းဖြစ်ကြောင်း စစ်တပ်ခေါင်းဆောင်ပိုင်းက သိရှိထားသည်။

xxx

အာဏာမသိမ်းမီက စာရေးသူတို့၏ အဖွဲ့အစည်းများသည် ဖက်ဒရယ် ဒီမိုကရေစီ နိုင်ငံတစ်ခု တည်ဆောက်ရန် သမ္မတဦးသိန်းစိန်နှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ ဦးဆောင်သော ယခင်အစိုးရများနှင့် စာချုပ်များချုပ်ဆိုခဲ့ကြသည်။ အဆိုပါစာချုပ်များကို ထိုစဉ်က ကာကွယ်ရေးဦးစီးချုပ်ဖြစ်သူ မင်းအောင်လှိုင်က အတည်ပြုလက်မှတ်ရေးထိုးထားခဲ့ပြီး ဖြစ်သည်။

xxx

တိုင်းရင်းသား လက်နက်ကိုင်တော်လှန်ရေးအဖွဲ့များ၏ ခေါင်းဆောင်များ ဖြစ်ကြသော စာရေးသူတို့သည် သက်ဆိုင်ရာ အသိုင်းအဝိုင်း၏ ကိုယ်စားလှယ်များ အဖြစ်သာမက နိုင်ငံအဆင့် လှုပ်ရှားဆောင်ရွက်သူများ အဖြစ် မိမိတို့ကိုမိမိ ရှုမြင်ခံယူကြသည်။ အာဆီယံအား ကျွန်တော်တို့ အစွမ်းကုန်ကူညီသွားမည် ဖြစ်သလို အာဆီယံ၏ တူညီဆန္ဒငါးရပ် ငြိမ်းချမ်းရေးအစီအစဉ်ကို အကောင်အထည်ဖော်ရာ၌ ကမ္ဘာ့ကုလသမဂ္ဂနှင့် အာဆီယံ၏ မိတ်ဆွေနိုင်ငံများက အကူအညီ ပေးကြရန်လည်း ကျွန်တော်တို့ တိုက်တွန်းတောင်းဆိုအပ်ပါသည်။

xxx

https://asia.nikkei.com/Opinion/ASEAN-must-help-reverse-Balkanization-of-Myanmar

https://s.nikkei.com/3X2mrFh

(Nikkei Asia မဂ္ဂဇင်းပါ Ta Doh Moo and Salai Thla Hei တို့၏ “ASEAN must help reverse Balkanization of Myanmar” ဆောင်းပါးကို ဆီလျှော်အောင် ဘာသာပြန်ဆိုထားခြင်း ဖြစ်ပါသည်)။

===========