ဖွဲ့စည်းအုပ်ချုပ်ပုံ အခြေခံဥပဒေ ဖျက်ပေမယ့် ပြည်သူ့အာဏာ မပျက်ရခြင်း
ဖွဲ့စည်းအုပ်ချုပ်ပုံ အခြေခံဥပဒေ ဖျက်ပေမယ့် ပြည်သူ့အာဏာ မပျက်ရခြင်း
(ဝါ) ပြည်သူ့အာဏာဖြင့် အစိုးရတရပ် တင်မြှောက်ခြင်း
==================================
ကမ္ဘာဦးကာလတွင် ဖွဲ့စည်းအုပ်ချုပ်ပုံ အခြေခံဥပဒေ မရှိပါ။ ဘုံစနစ်ကို ကျင့်သုံးသည်။ မင်း မရှိပါ။ ထိုမှ လူတို့တွင် ပုဂ္ဂလ ပိုင်ဆိုင်မှု ရှိလာသည်။ အငြင်းပွားကြသည်။ အမှုအခင်းကို ဖြေရှင်းရန် လိုအပ်လာသည်။ လူတယောက်ကို ဆုံးဖြတ်ရန် ရွေးချယ်ကြသည်။ လူတို့ ပထမဆုံး ရွေးချယ်သော သူကို နောင်အခါ မဟာသမ္မတမင်းဟု သမုတ်ကြသည်။ မဟာသမ္မတမင်း သေသော် နောက်ထပ် မရှာဖွေတော့ပဲ သူ၏ သားကို ခန့်အပ်ကြသည်။ ထိုမှ သားစဉ်မြေးဆက် မင်းမျိုး ဖြစ်လာသည်။ မြေယာပိုင်ဆိုင်မှုကြောင့် မြေရှင်များ ဖြစ်လာသည်။ မင်းတို့တွင် ဥပဒေမရှိ။ အမိန့်ဖြင့် အုပ်ချုပ်သည်။ နောင်အခါ လူတို့သည် မင်းကို တရားလက်လွတ် မရှိစေရန် စည်းကမ်းများ သတ်မှတ် အုပ်ချုပ်ရန် အကြံပေးသည်။ ထိုမှ မင်းတိုင်ပင်အမတ်များ ပေါ်လာသည်။ ဥပဒေများ ဖြစ်လာသည်။ ထိုမင်းများသည် သက်ဦးဆံပိုင် မြေပိုင် ကျေးပိုင် ကျွန်ပိုင်ဖြစ်လာသည်။ လူတို့မကြိုက်တော့။ မိမိတို့၏ မူလ ရည်ရွယ်ချက်မှ သွေဖယ်လာသော ပဒေသရာဇ်စနစ်ကို ဖျက်သိမ်းရန် ကြိုးစားသည်။ လူတို့သည် မိမိတို့ အာဏာကို ပြန်ယူရန် ဘုရင်ကို ဖြုတ်ချသည်လည်း ရှိ၏။ စည်းမျဉ်းဖြင့် ကန့်သတ်သည်လည်း ရှိ၏၊ ထိုမှ ဒီမိုကရေစီဆိုသော ပြည်သူ့အာဏာ ထွန်းကားလာသည်။ ၁၉၄၈ ကုလသမဂ္ဂတွင် လူသားတို့၏ မူလ ရပိုင်ခွင့်များ ကို သတ်မှတ်ကြသည်။ အပြည်ပြည်ဆိုင်ရာ လူအခွင့်အရေး ကြေညာစာတမ်းဟု ခေါ်ကြ၏။ ပုဒ်မ ၂၁ တွင် အစိုးရအာဏာသည် ပြည်သူလူထု ဆန္ဒ အခြေခံရမည်။ ပြည်သူ့ဆန္ဒကို လွတ်လပ်သော၊ လျှို့ဝှက်သော၊ အထွေထွေပါဝင်သော၊ တူညီသော မဲ အရေအတွက်ဖြင့် အချိန် အပိုင်းအခြား သတ်မှတ်ထားသော ၊ စစ်မှန်သော ရွေးကောက်ပွဲများမှ ဖော်ပြရမည်ဟု ကြေညာသည်။ အစိုးရတရပ်ဖြစ်ရန် အခြေခံဥပဒေ လိုအပ်သည်ဟု ပြဒါန်းမထားချေ ။ ( စကားချပ်၊ ဖွဲ့စည်းအုပ်ချုပ်ပုံ အခြေခံဥပဒေ constitution မရှိသော နိုင်ငံ ၅ ခုရှိသည်။ ဥပဒေဘိုးအေကြီး UK ဗြိတိသျှနိုင်ငံပါဝင်သည်။ base law များသာရှိသညိ။ )
ထို့ကြောင့် အစိုးရ တရပ် ဖြစ်ရန် အခြေခံဥပဒေ မလိုပေ။ ပြည်သူသာ အဓိက ဖြစ်သည်။ ပြည်သူ့ဆန္ဒ သည် အချုပ်အခြာ အာဏာ ဖြစ်သည်။
ပုဒ်မ ၂၁ နှင့် လျော်ညီသော ရွေးကောက်ပွဲရှိလျှင် mandate ဟုခေါ်သော ဆင့်လွှဲအာဏာ ကို ကိုယ်စားပြုသူများထံ လွှဲအပ်သည်။ ကိုယ်စားပြုသူများက စုဝေးကာ မင်းတပါးကို တင်မြှောက်နိုင်သည်။ အစိုးရတရပ်ကို ခန့်အပ်နိုင်သည်။ ဒီမိုကရေစီ စံနှုန်းညီရန် ၅၀% ထက်ကျော်သော အများစု ဆန္ဒရရှိရန်သာ လိုအပ်သည်။
ထိုအာဏာဖြင့် မဟာသမ္မတမင်းကို ခန့်အပ်သည်။ NUG အစိုးရ ကို ခန့်အပ်သည်။
ဒီမိုကရေစီက အဓိက၊ ဖွဲ့စည်းအုပ်ချုပ်ပုံအခြေခံဥပဒေက သာမည။
========================
ပြည်သူလူထုက ဆင့်လွှဲအာဏာ အပ်နှင်းသော ကိုယ်စားပြုတို့သည် စုဝေးကာ ဥပဒေပြုနိုင်သည်။ အစိုးရခန့်အပ်နိုင်သည်။
ဥပဒေပြုအာဏာရှိသောကြောင့် ဖွဲ့စည်းအုပ်ချုပ်ပုံအခြေခံဥပဒေ အပါအဝင် မည်သည့်ဥပဒေမဆို ဖျက်သိမ်းနိုင်သည်။ ပြင်ဆင်နိုင်သည်။ ပြဒါန်းနိုင်သည်။
၂၀၂၀ ရွေးကောက်ပွဲမှ ပြည်သူ့ကိုယ်စားပြုတို့သည် ဖွဲ့စည်းအုပ်ချုပ်ပုံအခြေခံဥပဒေ အဟောင်းကို ဖျက်သည်။ ဖက်ဒရယ် ဒီမိုကရေစီ ပဠိဉာဉ်ကို ပြဒါန်းသည်။ NUG အစိုးရကို ဖွဲ့သည်။
ကိုလိုနီခေတ်တွင် အင်္ဂလိပ် ပါလီမန်က ပြဒါန်းသော ၁၉၃၅ မြန်မာနိုင်ငံတော် စီရင်အုပ်ချုပ်မှု အက်ဥပဒေ ဖြင့် အုပ်ချုပ်သည်။ ၁၉၄၇ တွင် ၎င်းဥပဒေ ပါ ရွေးကောက်ပွဲစနစ်အတိုင်း အထွေထွေရွေးကောက်ပွဲ ကျင်းပသည်။ ဗိုလ်ချုပ်အောင်ဆန်း ဦးဆောင်သော ဖဆပလ ပါတီကို ပြည်သူက မဲပေး ရွေးကောက်ကာ ၎င်းတို့၏ အာဏာအပ်နှင်းသည်။ ဖဆပလသည် ပုံမှန် ပါလီမန်လွှတ်တော်အစား ၊ တိုင်းပြုပြည်ပြုလွှတ်တော်ကို ခေါ်ယူသည်။ ဖွဲ့စည်းအုပ်ချုပ်ပုံအခြေခံဥပဒေ အသစ် (၁၉၄၇ ) ကို ရေးဆွဲသည်။ အတည်ပြုသည်။ စဝ်ရွေသိုက်ကို ယာယီသမ္မတ ခန့်အပ်သည်။ ယာယီသမ္မတအဖြစ် ဘုရင်မ အဲလိစဘက် နန်းတက်ပွဲသို့ တက်လိုက်သေးသည်။
၁၉၄၈ ဇန်နဝါရီ ၄ နံက် ၄ နာရီ မိနစ် ၂၀ တွင် ၁၉၃၅ ခြေ/ဥ ဖျက်သိမ်းကာ ဖွဲ့စည်းအုပ်ချုပ်ပုံအခြေခံဥပဒေ အသစ် အသက်ဝင်လာသည်။ စဝ်ရွေသိုက်သည် သမ္မတကြီး ဖြစ်လာသည်။
လွတ်လပ်သော နိုင်ငံဖြစ်လာသောကြောင့် ရွေးကောက်ပွဲအသစ်လုပ်ရန် လိုအပ်ပါသလား။ ( မလိုအပ်ပါ၊ ) ၁၉၃၅ ခြေ/ဥ မှ ၁၉၄၇ ခြေ/ဥသို့ ပြောင်းလဲသော်လည်း ပြည်သူ့အာဏာသည် မပျက်ဆီးပါ၊ ၁၉၄၇ ရွေးကောက်ပွဲ ဆင့်လွှဲအာဏာ မပျက်ပါ။ ဖဆပလ သည် လွှတ်တော်နှင့် အစိုးရတွင် ဆက်လက် အုပ်ချုပ်သည်။ ၁၉၅၂ တွင်မှ ရွေးကောက်ပွဲ ထပ်မံကျင်းပသည်။
ကိုလိုနီခေတ်မှ လွတ်လပ်ရေး စပ်ကြားတွင်ပင် ဒီမိုကရေစီသည် အပျိုရည်မပျက်ခဲ့ပဲ ၊ လွတ်လပ်ရေးပြီး နှစ် ၇၅ ကြာသောအခါ မြန်မာတို့သည် ဒီမိုကရေစီကို နားမလည်ကြ၊ ခြေ/ဥပျက်ရင် ရွေးကောက်ပွဲမှ ဖော်ပြသော ပြည်သူ့ဆန္ဒပျက်ပြီ၊ ဆင့်လွှဲအာဏာ ပျက်ပြီဟု အထင်မှားသော လူဖျင်းလူညံ့တို့ ပေါ်ပေါက်လာလေသည်။
ဆက်ရန်
Comments
Post a Comment